Eraiki gabeko etxebizitza bat erosteko sarrera eman dute, eta urtebete igarota, oraindik ez dira hasi lanean

Duela urtebete, diru bat jarri nuen etxebizitza bat erosteko. Itxuraz, urte hartako abenduan ziren hastekoak. Dokumentu bat ere sinatu nuen, eta han esaten zen diru hori itzuli egingo zigutela etxea eraiki ezean, eta galdu egingo genuela guk atzera eginez gero. Ez da esaten, ordea, noizko emango ziguten etxea, eta oraindik ez dira hasi eraikitzen. Legeak ematen ote du aukerarik kalte-ordainak eskatzeko atzeratzeagatik, edo, bestela, ematen al du modurik jarritako dirua eskuratzeko?

  Aurrekontratuak zehazten du guk erosi dugun etxebizitza zein izango den, zenbat balioko duen eta noiz sinatuko dugun kontratu pribatua: lanak hasteko baimena eman eta hurrengo hamabost egunetan. Kode Zibilaren 1.451 artikuluak hauxe esaten du: "Saltzeko edo erosteko hitza emateak, prezioan adostuz gero, eskubidea ematen die kontratugileei elkarri eskatu ahal izateko kontratua bete dezatela". Auzitegiek esaten dute salerosketa kontratu batek dituen betebeharren parekoak ezartzen dituela aurrekontratu horrek, eta, beraz, erosleak eska dezake etxebizitza sal diezaiotela, behin udal baimen urbanistikoa edo lan baimena eskuratu eta hurrengo hamabost egunetan. Egokiena izango duzu udaletxean galdetzea ea baimen hori eman duten edo ez. Emana badago, buro fax bat bidal diezaiokezu sustatzaileari, eta eska diezaiokezu kontratu pribatua sinatu nahi duzula, edo hori bete ezean jarritako diru itzultzea nahi duzula.

Lanak hasteko baimena oraindik eman ez badute, jakin beharra dago zergatik atzeratu diren, eta ea sustatzaileek baduten horrekin zerikusirik. Sustatzailearekin harremanetan jarri beharra dago, esan dezan noiz sinatu ahal izango den kontratua. Hark zer erantzuten duen entzun, zer arrazoi eta aurreikuspen ematen dituen ikusi, eta bezeroak akordio bat negozia dezake, edo luzapen bat, baina beti abokatu baten laguntzarekin. Lanak hasteko baimenik eman ez badute, eta erabakia behi betikoa bada, jarritako dirua itzultzeko eskatu beharra dago, eta egoera zehatza zein den kontuan hartuta, interesak itzultzeko ere eska daiteke, eta jarritakoa halako bi itzul dezatela ere bai. Hori egiteko, buro fax zertifikatu bat bidali behar da, edo, bestela, Udaleko Kontsumo Bulegoaren bitartez egin. Azken aukera kontsumo ebazpeneko bideetara jotzea da, eta auzitara gero.

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du