Nazioarteko adopzioa. Erakunde laguntzailearen erantzukizuna

Bikote batek erakunde laguntzaile bat kontratatu du haur bat adoptatzeko, baina eten egin du kontratua, zerbitzu txarra eman dutelako

 Senar-emazte batzuek adopzio txosten bat jarri zuten abian Errusian erakunde laguntzaile baten bitartez. Hara joan zirenean, osasun egoera negargarrian aurkitu zuten eurei egokitu zitzaien neska. Erakunde laguntzailean lan egiten zutenek behin eta berriz adierazi zieten ongi pentsatzeko haur hura adoptatu aurretik, eta nahi bazuten beste haur bat izendatuko zietela. Azkenik, uko egin zioten haur hura adoptatzeari, baina erakunde laguntzaileak ez zuen lortu beste haur bat izenda ziezaieten. Senar-emazteen iritziz, erakunde laguntzaileak arduragabekeriaz jokatu zuen eta ez zuen bete kontratuak esaten zuena; ondorioz, auzitara jo eta kalte-ordaina eskatu zuen. 14.000 euro ordaindu zizkieten, baina erakundeak gora jo zuen, eta senar-emazteen aurkakoa izan zen epaia. Bikotea oso kexu zen zerbitzu txarra eman zietelako, eta azken erabakia hartzeko orduan, haurra adoptatu edo ez, presio handia egin zielako erakundeak. Madrilgo Probintzia Auzitegiak 2007ko uztailaren 11n eman zuen epaia, senar-emazteen aurkakoa. Haren ustez, kontratuak ez zuen esaten emaitza jakin bat ziurtatuko zietela, hori ez baitago erakunde laguntzailearen esku, haurraren herrialdeko auzitegien oniritziaren menpe baizik. Kontratuan bitartekari lana egiteko betebeharra hartu zuen erakundeak, ez besterik, eta, beraz, erantzukizunik ez zeukala erabaki zuen auzitegiak.

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du