Ikasle egoitzak eta unibertsitate egoitzak: 86 aztertu ditugu, Espainiako 18 hiritan: Zein hiri eta baldintzatan hartu nahi den ostatu, alde handia, egoitzatik egoitzara: zazpi halako ere bai hileroko prezioan

Segurtasun neurriak: egokiak dira, baina hobetu daitezke eta konparaketako taula

Ikasle egoitzen eta unibertsitate egoitzen % 86k badute alarma sistemaren bat -logeletan, % 60koa da portzentaje hori-, baina badira halakorik ez dutenak ere (Bartzelonan, Kordoban, Granadan, Madrilen, Malagan, Oviedon, Salamancan, Santiagon eta Sevillan gertatzen da hori, dozena bat egoitzatan). Egoitzarik gehienek badituzte su itzalgailuak eta larrialdiko argiak eta irteerak, baina irteera horien % 60tan, ordea, seinaleak ez daude behar bezala jarrita. Eta beste gabezia bat ere badute egoitzek: % 22k soilik egin dute azken urtean larrialdi itxura bat, egoitza nola hustu behar den oroitarazteko.

Arauak eta onarpen bideak: bakoitzak bereak ditu

Egoitza guztiek izaten dituzte arauak, eta horien bidez zehazten da egoitzako zerbitzu eta aretoak nola erabili behar diren, eta bizikidetza betebeharrak zein diren, bai ikasleen artekoak, eta bai ikasleen eta langileen artekoak ere. Erretzea, adibidez, debekatua dago Murtzian aztertu ditugun hiru egoitzetan, eta Santiagon eta Valentzian bisitatu ditugun gehienetan ere bai.

Sarbideetako kontrola, Iruñean da zorrotzena, eta han aztertu ditugun lau egoitzetan, ostatu hartuta dauden ikasleak soilik sar daitezke; egoitzatik kanpokoek galarazia dute. Lau egoitza horietatik bitan, gainera, ikasleek nahitaez parte hartu behar dute egoitzan bertan antolatzen dizkieten jardueretan (berdintsu gertatzen da Malagan aztertu ditugun lau egoitzetatik hirutan ere). Salamancan bisitatu ditugun egoitzen erdietan, zaindariek idatzita uzten dute ikasleak noiz irteten eta sartzen diren.

Diziplina arazo bat sortzen denean, ikasleekin hitz eginez konpondu nahi izaten dute egoitza gehienetan, gurasoak jakinaren gainean jarri gabe. Bestela jokatzen duenik ere bada, ordea: Alacanten, Iruñean eta Bartzelonan dauden egoitza askok gurasoei jakinarazi ohi diete euren seme-alabak nola dabiltzan egoitzan, edo nola doakien unibertsitatean.

Ikasleak egoitzan onartzeko bideei dagokienez, denetarik aurkitu dute gure teknikariek. Batzuetan, irizpide oso zehatzak jartzen dituzte ikasleak onartzeko: adibidez, unibertsitate jakin batean egitea matrikula, edo eskola dosier on-ona edukitzea. Horixe gertatzen da Kordobako, Madrilgo, Salamancako eta Zaragozako egoitzarik gehienetan, eta Oviedokoetan ere bai (egoitza batzuk BAME edo BABE ikasten ari direnentzat dira). Ikasleak batxilergoan eta selektibitatean atera dituen notei garrantzi gehien ematen dieten egoitzak Zaragozan eta Madrilen aurkitu ditugu.

Iruñeko egoitza guztietan eta Bartzelonako, Salamancako eta Valladolideko gehienetan, aintzat hartzen dute ikasleekin izaten duten elkarrizketa ere, eta Malagan, gainera, garrantzi berezia ematen diote familia bakoitzak irabazten duenari. Guztiz bestela jokatzen dute Bilbon, Donostian, Gasteizen eta Alacanten: ez daukate era horretako baldintzarik.

KONPARAKETAKO TAULA

(1) Informazioa: atal honetan aztertu dugu egoitzen arduradunek helarazi diguten informazioa eta gure teknikariei eman dietena bisitan joan direnean. Horiez gain aintzat hartu ditugu arauei dagozkien alderdi guztiak, onarpen irizpideei dagozkienak eta matrikula egiteko jartzen dituzten betebeharrei dagozkienak

(2) Irispideak: ezinduen beharrizanetara ongi egokituta ote dauden aztertu dugu. Egoitzako eremu guztietako irispideak ikuskatu ditugu, ea behar bezala moldatu dituzten ikusteko: sarbideetan, egoitza kanpoko eremuetan, aparkalekuetan, logeletan, bainugeletan, guztiek erabiltzeko diren guneetan, igogailuetan...

(3) Garbitasuna: mantentze eta zaintze lanen atalean, arreta berezia jarri diogu garbitasunari, eta zorrotz aztertu dugu nola garbituta dauden logelak, bainugelak, guztiek erabiltzeko guneak (kirolguneak, ikasgelak, jantokia, kafetegia, lorategiak); eraikina bera ere nola zainduta dagoen aztertu dugu, altzariek zer itxura duten, zorua nola dagoen...

(4) Segurtasuna: larrialdi egoerei nola erantzungo lioketen aztertu dugu atal honetan; arrisku egoeretarako protokolorik ba ote duten, larrialdiko argi eta irteerarik baden, suteen aurkako mekanismorik baduten, zaindaririk edo kamerarik jarri duten, larrialdi itxurarik egin duten azken urtean, egoitza nola hustu behar den oroitarazteko...

(5) Zerbitzuak: azkenik, egoitza bakoitzak zer zerbitzu eskaintzen dituen aztertu dugu: zer logela mota dituen, zer mantenu aukera, kirolgunerik baduen, eremu berderik, jarduerarik antolatzen ote duen egoitzak berak, osasun zerbitzurik baduen, ikasleei laguntza pedagogikoa eta psikologikoa emateko lan talderik, garbitegirik, garraio zerbitzurik...

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du