Etxebizitza eta trastelekua erostea. Kontratuan ageri dena ez dute osorik bete

Trastelekua txikiagoa da kontratuak dioena baino

 Zenbait eroslek etxebizitza bat erosi zuten, trasteleku eta guzti. Jabetza-agiriak sinatu zituztenean, eraikitze-lanak bukatu gabe zeuden, eta trastelekuak egiten ari ziren. Handik sei hilabetera, lanak bukatu zirenean, ezustekoa izan zuten: trastelekuen gainazal erabilgarria txikiagoa zen jabetza-agiriek agintzen zutena baino. Salaketa jarri zuten sustatzailearen aurka, eta kalte-ordaina eskatu zuten, salerosketa-kontratua osorik ez betetzeagatik. Eta irabazi zuten. Bezero bakoitzari 3.000 euroko kalte-ordaina eman behar izan zion enpresak, eta interesak eta gastuak ere ordaindu behar izan zizkien. Halaxe erabaki zuen Bizkaiko Probintzia Auzitegiak, 2008ko otsailaren 26ko sententzian. Adituen txostenak frogatu zuen erosleek arrazoi zutela, eta trastelekuaren gainazal erabilgarria ez zetorrela bat jabetza-agirietan jartzen zuenarekin. Horrez gain, txostenak egiaztatu zuen zutabe bat zegoela trastelekuen erdian, eta horrek oztopo asko jartzen zituela han mugitzeko. Hortik aurrerakoa kalkulua egitea izan zen: trastelekuen metro koadroa zenbatean zegoen ikusi, eta erosleek enpresari eskatu zioten kalte-ordaina egokia ote zen aztertu. Hala zela erabaki zuen epaileak.

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du