Segurtasuna ikastetxeetan: Espainia osoko 208 ikastegi aztertu dira: Lau ikastetxetik batek ez du segurtasun proba gainditu

Balizko larrialdi batetara begirako segurtasuna: asko da hobetzekoa eta konparaketako taula

Itzalgailuak zentro guztietan baziren arren (dena dela, kasuen %2tan ez zegoen behar adina aparatu edo ez zeuden eraikineko oin denetan), horien %28k ez zuten suteei buru egiteko ur-hartunerik (2003an oraingoaren bi halako izan zen portzentajea). Hiru zentrotik batean, gainera, ez daukate suteak atzemateko sistemarik (2003an, honetan ere, proportzioa bikoa zen). Halaz ere, ikastegien %92k badauka, larrialdirik suertatuz gero, alarma emateko soinu-sistemarik baina gainerako %8tan (txarrenak, Granada, Madril eta A Coruñan) ez zegoen horrelakorik edo ez zuten behar bezala funtzionatzen, elkarrizketa honetan parte hartutako arduradunek aitortu zutenez. Nolanahi ere, alarma-seinaleak zentroko dependentzia den-denetan entzungarri behar du izan, baita eraiki bat baino gehiago diren kasuetan ere.

Gabezia latzenetako bat, larrialdiko irteerena da: zentroen %28k ez dauka horrelakorik; larrialdiko irteera dutenen %2k, berriz, erabiltzea galarazten duten oztopoak dauzka tartean eta %13 ez dira erraz irekitzen edo giltzaz itxita daude; kasuen %17tan ez dira kanporantz irekitzen, arauak xedatutakoa urratuz. Horrez gainera, larrialdiko irteerak adierazteko kartelik ez dago zentroen %13tan (2003ko proportzioa hiru halakoa zen). Larrialdirik gertatzekotan nola jardun behar den adierazteko kartelik edo eskemarik ("Hemen zara zu" motako planoak) ez dago ikastetxeen erdietan, kasik. Almeria, Kordoba, Madril eta Zaragozan bisitatu diren ikastegietan, lautik hiruk ez daukate horrelakorik.

Hobetu beharreko beste atal bat, ikasgeletako burdin hesidun leihoak dira: hauek barnetik irekitzeko modukoak izan behar dute, sute, ebakuazio edo bestelako zeinahi larrialdirik gertatzekotan, bertatik irten ahal izan dadin: leiho burdin hesidunak dauzkaten zentroen %37tan ezinezkoa izan zen hori, baina proportzioa, 2003ko haren (%73) aldean, jaitsi egin da.

Hiru zentrotik ia batean korridorera begira zeuden ikasgeletako ate batzuk aurrez aurre zeuden eta horrek, bistan da, larrialdi kasuan, jendea bertatik ebakuatzea eragozten du; atal honetan txarrera egin dugu, 2003 urtean bortetik bat baizik ez zen. Hobekuntzarik izan ez duen beste atal bat sukaldeei dagokiena da: zortzi ikastegitik batek suteen kontrako babesari buruzko arautegia ez du betetzen, sukaldea behe solairuan ez daukalako (2003an ere, antzeko proportzioa zen). Valladolid, Valentzia eta Murtzian zentroen erdiek erakutsi zuten gabezia hau baina hamazortzi hiri horietako hamaikatan segurtasun-baldintza nagusi hori zentro den-denek betetzen zuten. Bestetik, sukaldea daukaten lau zentrotik batean, dependentzia horrek ez ditu bi irteera, horietako bat (gutxienez) kanpo aldera, legeriak horretara behartzen duen arren.

KONPARAKETAKO TAULA

(1) Segurtasuna aire zabaleko tokietan: hainbat alderdi aztertu dira, hala nola patioan objektu arriskutsuak dauden; langak, saskiak edo bestelako elementuak arriskugarriak diren eta zoruari behar bezala josiak dauden; ikastetxearen inguruneetan tentsio garaiko lineak dauden; patioko zorua kontserbazio-egoera onean dagoen; eraikinen kanpo aldean gune arriskutsurik baden.

(2) Segurtasuna toki itxietan: objektu arriskutsuak dauden; gelen irteerak korridoreetan parez pare dauden (horrek ebakuazioa eragotziko luke); burdinsaredun leihoak barrenetik ireki daitezkeen; komunetan, gimnasioan, jantokian, korridoreetan, eskaileretan, etab. objektu arriskutsuak dauden. Sukaldea daukaten ikastegietan: beheko oinean dagoen eta bi ate dituen (horietako bat, kanpo aldera).

(3) Larrialdi plana eta osasun arreta: segurtasun, ebakuazio edo larrialdiko planik ba ote den; langileak plan horretako partaide diren; simulakroak egiten diren eta, hala izatekotan, nolako maiztasunarekin egiten diren; larrialdirik gertatzekotan, jarduteko protokoloaz idazleek idatzizko informaziorik baduten; ikastetxeak beharrezko titulua duen pertsona baten ardurapeko erizaintza-gela edo botikina ote duen.

(4) Suteen kontrako segurtasuna: zenbat itzalgailu dauden eta nolako egoeran; ur-hartunerik ba ote den; toki itxietan larrialdiko argirik ba ote den; suteak atzemateko sistemarik eta larrialdiko irteerak adierazteko kartelik hauteman den eta irteerak baliagarri ote dauden.

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du