Nabigatze-menua pasa eta edukietara joan

  • Bienvenido (ES) | Ongi etorri (euskarazko bertsioa) | Benvingut (versió en català) | Benvido (versión en galego)
  • Bienvenido (ES)
  • Buletinak
    •  | Utzi  | Aukerak |
  • Aurreko portadak

EROSKI CONSUMER, el diario del consumidor

Bilatzailea

logotipo de fundación

EROSKI CONSUMEReko kanalak


Kokapen honetan zaude: Hasiera > Paperezko bertsioa > Psikologia

Λ

Berriro eskolara: Traumarik gabeko itzulera

Aurreikuspen pittin batek eta arreta eta maitasun askok arin ditzakete oporraldien ostean eskolara joan behar desatseginaren ondorio latzak

 Oporraldien amaierak eta eguneroko bizimodura itzultzeak ez du helduengan bakarrik eragina: haurrak ere bizipen latza nozitzen du eskolara edo haurtzaindegira itzuli behar horrekin. Hiru hilabeteko oporraldien ondoren ikasgelan ostera sartzeak egokipen alorreko arazoak eragiten dizkie 3 eta 8 urte arteko mutiko-neskatoen %5i. Eskola eta ikasketa erritmoa berreskuratzea, txikienek eta, noski, eskolara lehen aldiz hurbilduko direnek bereziki, ikasturteko ikasgai zailena dute. Formula magikorik ez badago ere, "itzulera operazio" berezi hori leundu egin daiteke.

Aurretiazko prestaketa

  • Eskolak hasi aurretik, joan zaitez haurrarekin ikastetxea ikustera, aurkez iezaiozu irakaslea, norekin geratuko den jakin dezan. Horrek, lehen egunean biziki arrotz ez sentitzeko lagunduko du umea.
  • Ulertzeko gauza bada, irakur iezazkiozu ipuinak: eskolan hasten diren haurrez, lanera doazen eta arratsaldean lana amaitutakoan umeen bila ostera datozen aita-amez, haurtzaindegi edo eskolako jarduerez...
  • Konta iezazkiozu zeure haurtzaroko bizipenak. Horiek gogora ekarri eta berarenekin lotzean, ingurune berrian lasaiago sentituko da.
  • Azal iezaiozu zehatz-mehatz eskolako lehen egun horretan zer ezagutuko duen, zer biziko duen.
  • Emaiozu bidea haurrari bere beldur, kezka eta beharrak azal ditzan.
  • Eskolara joatea betebeharreko eta pribilegio gisa aurkeztu behar diozu, adibidez: "Zuk bai zorionekoa, orain eskolara zoazena!". Ez ibili mehatxuka, "Ikusiko duzu, eskolara joatean" etc.: horrela, ikastetxea desatsegin eta kaltegarritzat joko baitu.
  • Eskolara egin baino egun batzuk lehenago, ahal den neurrian, has zaitez bizimodu berrian ohikoak izango duen ordutegi berrira egokitzen: jaikitzeko, bazkaltzeko, siesta egiteko, bainatzeko eta gainerako orduak finkatzen.
  • Haurra txikia izanik, oraindik siesta egiteko ohitura badu baina eskolak aukera hori ematen ez badio, has zaitez bide berritik abiatzen.
  • Presta ezazu haurrarekin ikasturte berrian beharrezkoa izango duen material guztia. Erabili esku artean seme-alabarekin testu-liburu berriak, txikia ohi dadin eta erabiltzeko interesa piztu dakion.

Egun handia

  •  Lehen eskola egunean aita edota ama umearekin joateak garrantzi handia du. Egun alaia izan dadin ahaleginak egin behar dira.
  • Ikastetxe berrian lehen eguna baldin badu, saia zaitez goiz iristen, zure haurra lehenetako bat izan dadin. Horrela ikaskideak etortzean ikusiko ditu, bere burua ez du behaturik sentituko.
  • Ager ezazu poza: hark negar edo tristura zantzorik ikusten badizu, baliteke mesfidantza eta abandonatze sentsazioa sortzea, parte onekoa ez den toki batean utzi duzula pentsatuko du.
  • Ez luzatu banantzeko unea. Izan zaitez adeitsu, maitekor, baina gehiegi gabe, labur. Umeak negar edo oihu egiten badu ere, despedidak azkarra izan behar du, dramarik gabea: bestela, kasketa baliatzen ikasiko du, eskolara geroago sartzeko amarru gisa.
  • Ez agindu beteko ez duzun ezer ere, hala nola: "Autoa aparkatu eta oraintxe nator zurekin". Umeak bere burua engainaturik ikusten badu nekezago izango du zugan konfiantzarik.
  • Jasotzeko orduan izan zaitez puntual. Umeak bere burua abandonatua senti dezake, ikaskideen gurasoak seme-alaben bila datozkiela ikustean.
  • Negar egitearen ondorioz begiak gorriturik atzematen badizkiozu, ez egin inongo iruzkinik errukitzeko: horrela gauza bakarra lortuko duzu, eskolan ere negarrez aritzea, aita edo ama salbatzailearen etorreraren zain.
  • Hitz egin berarekin ongi-ongi portatu dela badakizulakoan eta eskolara joan izanaren abantailak azpimarratuz, berak daukan pribilegioa balitz bezala.

Errutina egokipean

  • Probestu uda parteko asteburuak seme-alabekin gauza atseginak eginez gozatzeko. Antola itzazu aisialdiko jarduerak, ez hautsi bat-batean udako errutina.
  • Hasieran negar egitea ohiko kontua bada ere, jardun ezazu harremanetan irakasleekin egokipen-epea nola garatzen ari den jakiteko: haurrak jardueretan esku hartzen duen eta, oro har, egokiro integratzen ari den. Ongi egokitu ezean, zuk lagundu beharko duzu hori lortzeko formula aproposa bilatzen. Haur batzuek hiruhileko osoa behar izaten dute bizimodu berrian egokitzeko.
  • Egokipen-epea gainditu bitartean, eskolara joate hori errutina huts bihur dadin komeni da: prestaketa berberak, iristeko eta abiatzeko ordu berberak, etc.
  • Egokipen-epean ahaleginak egin behar dituzue haurra egunero eramateko. Eskolara joateari ez dio utzi behar, salbuespen gisa izan ezik, egokipena luzatu egin daiteke eta.
  • Saia zaitez eskolako kideren batekin harremanetan jardun dadin eskola-ordutegiz kanpo. Eskolako lagunak beste hainbat tokitan (jolas parkean, etxean, etab.) ikusteak eskolan ere beraiekin izateko nahikundea areagotuko dio.
  • Aurreneko egunetan eskain iezaiozu ahal duzun denbora guztia; arratsaldean presta ezazu biharamuneko itzulera, goizeroko atsekabea bihur ez dadin.
  • Ohera ezazu goiz: nekatua dagoen haurrak jokabide-arazo eta egokitzeko zailtasun gehiago izaten ditu.
  • Iratzar eta jaiki ezazu behar bezain aurretik: goizean denboraz eskas ibiltzeak urduritasuna sortuko dio. Are eta latzagoa umore txarrez esnatzen den horietakoa baldin bada.
  • Erakuts ezazu interesa hark eginiko aurrerapenez. Egiezu galde eskolaz giroa lasaitu denean, gauean, bainuan, etc., hitz egitera behartu gabe.


Ekintza honek Bizkaiko Foru Aldundiaren Kultura Sailaren laguntza jaso du

Beste zerbitzu batzuk


Bilatu

Copyright-i buruzko informazioa eta lege-oharra

Visita nuestro canal Eroski Consumer TV

 EROSKI CONSUMERen oso serio hartzen dugu zure datuen pribatutasuna, lege oharra. © EROSKI Fundazioa

EROSKI Fundazioa

Validaciones de esta página

  • : Conformidad con el Nivel Triple-A, de las Directrices de Accesibilidad para el Contenido Web 1.0 del W3C-WAI
  • XHTML: Validación del W3C indicando que este documento es XHTML 1.1 correcto
  • CSS: Validación del W3C indicando que este documento usa CSS de forma correcta
  • RSS: Validación de feedvalidator.org indicando que nuestros titulares RSS tienen un formato correcto