Alkoholaren eraginpean ibilgailua gidatzeagatik aurreikusiriko indemnizazioa ez zioten ordaindu

Kontsumitzaileak ibilgailua erosi eta balizko kalteengatiko erabateko bermea kontratatu zuen. Trafiko istripua nozitu zuen, erabiltzailearen iritziz, ibilgailuaren akats baten ondorioz. Bide tarte zuzen eta erraz gidatzeko moduko batetik irten egin zen eta airbag sistemak ere huts egin zion. Jasaniko kalteengatik eta matxurak eta atzeko balaztetan hutsegiteak argudiatuz, kontzesionario eta fabrikatzailearen aurkako demanda ezarri zuen, baina lehen instantziako epaitegiak ezetsi egin zion, istripua gertatu aurretik airbag sisteman eta besteetan akatsak izateko aztarnak baziren arren, istripua jazo zen unean kontsumitzailea alkoholaren eraginpean gidari zihoala ulertu baitzuen. Auzia Lurralde Auzitegira eramanik, 2003ko martxoaren 13ko sententziak dioenez, perituak eginiko frogetatik, istripua lurzorua egoera egoki-egokian zeukan ikusgarritasun osoko tarte zuzen batean gertatu zela ondoriozta zitekeen: beraz, gidariak balazta sistema eragin beharko zuela nekez sinets zitekeen. Perituek adierazi zutenez, balaztatze sistemako akatsak istripuaren eragile izateko aukerak hutsaren hurrengo ziren. Auzitegiaren iritziz, kontsumitzaileak ibilgailuaren akatsa frogatuta ez zuenez, bere erreklamazioa ezetsi eta kostuak ordaintzera kondenatu zuen.

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du