Azpikontrataturiko gremioak gaizki eginiko lanaren ardura, establezimenduarena

Ene aita-amaginarrebek, bainugelan erreformak egiteko, establezimendu batera jo zuten. Azulejoak aldatzea, manparadun dutxako pila bat eta sabaian halogenoak ezartzea obra barruan sartzen zen. Dendak igorri zuen iturginak azulejoak aldatu eta dutxako pila instalatu zuen baina, manpara ezarri behar zuenak zioenez, pila ez zegoen ongi kokatua eta, era hartan, manpara jartzerik ez zegoen. Dendako arduradunak erantzukizunik ez du bereganatu nahi izan, horretan errugabe dela argudiatuz. Nola jardun dezakegu orain?

 Bezeroek bainugelan erreformak egiteko agindu zuten, material eta guzti. Komertzioarekin eginiko kontratuaren edukia ez omen da materialen salerosketa hutsa, obra kontratua baizik. Obra kontratu horretan alderdiak kontsumitzailea eta establezimendua dira, Kode Zibileko 1544, 1588 eta hurrengo artikuluetan araututa dagoen bezala. Horrelako kontratuetan profesionalak bere lana eta, zenbaitetan, materiala ere jartzen du, eta lanaren exekuzio egokia egiteko konpromisoa hartzen du (kontratuan adierazitako baldintzen arabera edo, bestela, fede oneko eta sektoreko ohiko jarduerei jarraiki). Horren truke bezeroak dirua entregatu behar izaten dionez, itun edo hitzarmen hori emaitza derrigortua duen kontratua da. Obra akatsez egin denez, lanak kontratatu dituen establezimenduari erreklamazioa egin diezaioke kontsumitzaileak. Onartutako kontratu edota aurrekontuetan agertzen diren terminoak arreta handiz irakurri behar dira. Ondoren, jasotze agiri egiaztatua duen bureau fax baten bitartez, kontratua bete dadin (hau da, obrak amaitzea) eskatu behar da, aukeratu den eta aurrekontuan adierazita dagoen manpara egokiro instalatu arte akatsak eta gabeziak konponduz. Obra hasierako data itundu beharko da idatziz eta, lanak amaitutakoan, aurrekontu osoa ordaintzeko konpromisoa mantendu beharko du bezeroak. Establezimenduak bere ardura onartu nahi ez duelako akordiorik lortuko ez balitz, abokatuarengana egitea komeniko litzateke -eta, horren bitartez, perituarengana-.

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du