Bularra txikiagotzeko ebakuntzak ondorioak utzi

 Bularra txikiagotzeko asmoz, emakume bati kirurgia estetikoko ebakuntza egin zioten. Haren ondorioz, gehiegizko ebakiondo edo orbainak geratu zitzaizkion, aureolak galdu zituen eta, gainera, 37 egunetan ezindurik gertatu zen. Arriskuez behar bezalako informazioa eman ez zitzaiola eta izaniko emaitza kontratatutakoaz bestelakoa izan zela kontuan izanik, sendagilearen eta honen aseguru-konpainiaren kontrako demanda aurkeztu zuen. Lehen instantzian, demanda hura auzitegiak aintzat jo bazuen ere, eskaturiko indemnizazioa 110.000 eurotik 15.000 eurora jaitsi zuen. Alderdi biek apelatu egin zuten. Bartzelonako Audientziak 2002ko urriaren 8an emaniko sententzian, emakumearen helegitea partzialki onetsi zuen, indemnizazioa 48.000 euro inguruan ezarriz. Audientziak dioenez, Osasun Legearen arabera, pazienteari bere gaixotasunaren diagnostiko, pronostiko eta trataeraz gainera, ebakuntzaren arriskuez ere informazio osoa emateko obligazioa du sendagileak. Areago, kirurgia estetikoaren alorrean, informazioa emateko obligazioa larriagoa denez, pazienteak sinatu zuen dokumentuak (bertan sendagilearen sinadurarik ere ez baitzen) ez du betetzen legezko eskakizun hori. Azkenik, Audientziaren iritziz, kirurgia estetikoko ebakuntzetan, emaitza hertsikiago bermatu beharra dago.

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du