Konponketa-aurrekontua idatziz jasotzeko eskubidea du erabiltzaileak

Bideo aparatua hondaturik dudanez, konponketa-zerbitzura eraman dut. Konpontzea merezi ote zuen jakiteko aurrekontua eskatu nuenean erantzuna hau izan zen: aurrekontua eskainiko zidaten konponketaren kostua 60 eurotik gorakoa bazen. Merkeagoa izatekotan, konpondu egingo zidaten, besterik gabe. Aparatua konpontzea hirurogei euro inguru (zerbait gutxixeago) kostatuko dela susmatzen dut. Ba al dut zerbait eskatzerik ala esan zidaten harexekin konformatu behar dut?

Konponketa Zerbitzuaren jokaera ez dagokio hertsiki arauteriari, Etxe-erabilerako aparatuen konponketa zerbitzuei buruz urtarrilaren 29an emaniko 58/1988 Errege Dekretuari, zehazkiago. Errege Dekretu horren arabera, eskatzaileari jakinarazpena eman ondoren hogeita hamar eguneko baliozkotasuna duen idatzizko aurrekontua jasotzeko eskubidea dute erabiltzaileek. Kasu honetan aurretiaz aurrekontua eskatu denez, konponketa zerbitzuak gehienez ere bost laneguneko epean entregatu behar du. Edonola, azkenean hori onartzen ez bada ere, aurrekontuaren kostua ordaindu beharra dago. Aurrekontua onartzen ez bada, aparatua entregatu zen egoera berean itzuli behar du zerbitzuak. Etxe-erabilerako aparatu txikiak direnean, aurrekontu horren kostu gisa erabiltzaileari profesionalaren hamabost minutuko lana kobratu ahal izango zaio; lerro zuriko aparatuetan, hogeita hamar minutu eta lerro marroi eta elektronikokoak (bideoa, adibidez) direnean, hirurogei minutu.

Zerbitzu horiek, lanagatik aplika daitezkeen prezioak, garraioaren eta leku-aldaketen kostuak jende aurrean eta era ikusgarrian erakutsi behar dituzte; baita, hala dagokionean, eskaintzen diren beste gainontzeko zerbitzuen prezioak ere, larrialdiz edo aparteko izaeraz egiten direnenak barne, erabiltzaileak hala eskatuta. Prezio horietan zama edo karga guztiak sartuko dira, BEZ izan ezik. Era berean, hurrengoa adierazten duten kartelak ezarri behar dira agerian: "Erabiltzaileak eskatzen dituen konponketa-lan edo bestelako zerbitzuen idatzizko aurrekontua jasotzeko eskubidea du beti. Aurrekontu hori erabiltzaileak ordaindu beharko du baldin eta, berak eskatu duenean, onartu egin ez badu, ez bestela".

Arautegi hori ez betetzea arau-haustetzat hartuko da eta, bidezkotzat jotzen bada, erreklamazio-orrian jaso ahal izango da, kontsumo gaietarako Udalerriko agintaritzari igortzeko.

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du