Kalte-ordaina lortu zuen, ez maleta galdu zelako, entregatu ez ziotelako baizik

1998an senar-emazte batzuek Puerto Ricorako bidaia egin zuten Iberiarekin. Bikoteak ekipajea fakturatzean ez zuen egin bertako objektuen balio osagarriaren aitorpenik. Hara iristean emaztearen maleta agertu ez zenez, konpainiari erreklamatu zioten eta galera onarturik, USAko 200 dolarreko kalte-ordaina ( une hartan 186,32 euro, 31.000 pezeta) eskaini zien. Bikoteak uko egin zion kopuru hori jasotzeari eta epaitegietara jo zuten. 237.201 pezeta eskatu zituzten eta konpainiak ezezkoa eman zuen, nazioarteko hegaldia izanik kalte-ordaina kilogramo bakoitzeko 20 dolarrera mugatzen zuen araudia ezarri behar zela esanez, balioaren aitorpen berezirik egin ez zelako. Palma de Mallorcako Auzitegiak, 2000ko azaroko epaian, onartu egin zuen arautegi hori bazela, baina kaltetuek ez zioten konpainiari ekipajearen garraioari buruzko erantzukizuna erreklamatzen, baizik eta ekipajea aurkitu eta hotelera eramateko atzerapenean oinarritu zuten demanda. Izan ere, Konpainiak ez zuen justifikatu maleta xede-lekura entregatzea zergatik atzeratu zen eta kaltetuei horrek eragin zien kalte psikikoa zela eta, ezin izan zuten oporrik gozatu; horrenbestez, kontzeptu horregatik eskatzen zuten kalte-ordaina, bidaiaren hiru eguneko prezioa hain zuzen ere. Eskatutako kopurua ordaintzera zigortu zuen Auzitegiak Iberia.

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du