Hamabi aireporturen hainbat alderdi aztertu dira: sarbideak, zerbitzuak, segurtasuna, erosotasuna, aisia, antolamendua, garbitasuna eta mantentzea: Erosotasun eta komunikazioei dagokienez, Espainiako aireportu nagusi gehientsuenek hobera egin behar dute

Aireporturik egokiena... eta konparaketako taula

• Bertaraino iristeko, Malagakoa, hiritik bertatik abiatuta seinaleztapen egokia erakusten duelako, garraio publikoaren bidez irits daitekeelako hegaldien ordutegiari egokiturik, eta taxi-zerbitzua ona delako (merkea eta ibilgailu-kopuru handia martxan).
• Barruan ez galtzeko, Valentziakoa, bertako orientazioa on-ona delako, seinaleak oso eraginkorrak direlako, helduera eta irteeren berri ematen duten pantailen kopuru ugari eta kokapen onagatik, megafoni sistemaren funtzionamendu zuzenagatik eta informazioa eskaintzeko baliatzen diren hizkuntzen kopuruagatik.
• Itxaronaldi luzeetan itolarriak ez jotzeko, Malagakoa, bertako atseden-guneen erosotasunagatik eta itxaronaldiak atsegin bihurtzeko kezkagatik (pintura erakusketa eta, txikientzako, jolastoki egokitua).
• Aireportuko pertsonalari kontsultak egiteko, Palma eta Santiagokoak: arreta eta zerbitzu ona eskaintzeaz gainera, galdeturiko tokiraino lagunduak izateko eskatu zitzaienean ez zuten inolako eragozpenik ezarri.
• Itxaronaldia aprobetxatzeko, erosketak egin eta aireportuko zerbitzuez gozatuz, Madrilgoa: bertan, ohikoez gainera, beste hamaikatxo zerbitzu ere eskaintzen dira: 30 komertzio baino gehiago, banka bulegoak, erlijio zerbitzuak, haurtzaindegia, etab.
• Aparkatzeko, Iruñea eta Donostiakoa, bietan ere aparkalekua doanekoa baita, nahiz eragozpen txiki bat duen: zaintzailerik ez da bertan.
• Diru askorik gastatu gabe, kafe edo freskagarri bat hartzeko, Bilbokoa, freskagarriari dagokionez bereziki; beste aireportu batzuetan 2 eurotik gora ordaindu behar delarik, Bilbokoan 1,25 euro baino ez da kostatzen.
• Makina edari-saltzailean freskagarri bat hartzeko, Bilbokoa berriz; makinak emaniko freskagarria 1,05 euro kostatzen da; Iruñekoan, aldiz, 1,95 euro (garestiena, atal honetan).
• Aireportu garbien eta hobekien kontserbatua, Madrilgoa: sekulako arreta nabarmentzen da, bai instalazioetan, bai komunetan ere.

KONPARAKETAKO TAULA

1.- Aireporturainoko garraiobideak: kasuan kasuko hiri erdialdetik aireporturainoko taxiaren kostua eta hiriko irteeretan zein aireportu inguruneetan dagoen seinaleztapena aski den aztertu da. Era berean, garraio publikoari dagokionez, aireportuak komunikazio onak dituen, aireportuko ordutegiak lehen eta azkeneko hegaldien ordutegiekin bat datozen eta kasuan kasuko aireportura iristen diren hegaldien premiak betetzeko adina taxi dagoen ere balioztatu da.

2.- Moldagarritasun eta antolamendua: aireportuak pertsona ezindu edo itsuentzat moldatu edo egokituta dauden aztertu da. Era berean, aireportuko ordutegien azalpenak, norabidea adierazteko geziak edo bestelakoak badiren, aireportuan orientatzeko erraztasuna, iriste eta abiatzeen berri emateko pantaila adierazleak badiren, megafoni sistemaren funtzionamendu zuzena den eta informazioa ematean erabiltzen diren hizkuntzak ere hartu dira kontuan.

3.- Erosotasun eta aisia: komertzio edo ostalaritza pribatuarenak ez izaki, esertzeko moduko tokiak ba ote diren, zenbat diren, aireportuan barrena nola banatuta dauden eta horien erosotasuna aztertu da multzo honetan. Era berean, itxaronaldia atsegin bihurtzeko doaneko sistemarik ba ote den ere kontuan izan da.

4.- Aireportuko zerbitzuak: aireportuak dituen zerbitzu guztiak, alegia: jendeaz arduratzeko berariazko pertsonala (Aena-ko txaketa berdeak) baden egiaztatzea izan da multzo honetako eginkizuna; baita langile horiek agertutako adeitasuna eta eskainitako informazioaren eta arduraren (galdetutako tokiraino erabiltzailearekin joaten diren, alegia) kalitatea ere. Kontsignak badiren eta, izatekotan, horien prezioa zein den, ekipajeak garraiatzeko orgak toki estrategikoetan eta behar bezainbeste badiren, erabiltzaileak kexu egiteko tokirik baden eta non dagoen, erreklamazio orriak eragozpenik ezarri gabe ematen diren eta, azkenik, Europar Batasuneko Bidaiarien Eskubideen Karta baden eta non dagoen ere balioztatu da. Horiez gainera, haurtxoak garbitzeko tokirik baden eta non dagoen (emakumezkoen edo gizonezkoen komunetan, bientzakoetan edo horretarako berariazko tokietan), kafetegietan eta (horrelakorik baldin bada) makinetan kafe batek eta freskagarri batek zenbat balio duen eta aireportuko gainontzeko zerbitzuak (aparkalekua barne) aztertu dira.

5.- Garbitasun eta kontserbatze egoera: bai aireportuaren beraren, baita zerbitzu jakinetako (komunak, adibidez: hauetan, berariaz, hornikuntza osoa duten egiaztatu da) higienea, kontserbatze-egoera eta argiteria ikertu dira. Horrez gainera, paperontzirik baden, zenbat dauden, nolako egoeran eta birziklatzeko prestatuak dauden ala ez, aztertu da.

6.- Aireportuko segurtasuna:multzo honetan suteen kontrako tresneria, segurtasuneko pertsonala eta bestelako sistemak (hala nola bideo-kamerak) badiren, aireportuan atzematen den segurtasun-giroa, larrialdiko irteeren seinaleztapen zuzena, larrialditan egin beharrekoak adierazten duten argibide edo seinaleak, osasun asistentziako zerbitzua, erretzeko debekapena eta horiek denak betetzen diren aztertu da.

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du