Testamenturik ez badago, ondorengoek erosi egin dezakete ezkontideak usufruktuan duen jabetza zatia

Nire ezkontidea duela urte batzuk hil zen eta jabetza utzi zuen, testamenturik egin gabe. Seme bakarra daukat, adinez nagusia, eta jabetza saldu egin nahi du. Zenbat dagokit niri alargun gisa, eta zenbat nire semeari ondorengo gisa?

Ezkontideetako bat testamenturik egin gabe hiltzen bada eta alarguna eta seme-alabak uzten baditu, seme-alabentzat dira zenduaren ondasun guztiak eta ezkontideari ondasunen herenaren usufruktua dagokio. Kasu honetan, hildakoaren jabetza pribatiboko ondasun higiezin bat da herentzian dagoena eta seme bakarra eta ezkontide alarguna daudenez, semeari dagokio higiezinaren jabetza eta amari higiezin horren heren baten gaineko usufruktua.

Kode Zibileko 839 artikuluaren arabera, ondorengoek erosi egin diezaiokete ezkontideari usufruktuan geratu den zatia, diru bidez eta, horrelakorik ezean, agindu judizialez. Usufruktua dirutan baloratu nahi bada, nahi den akordioa lor daiteke, baina Oinordetza eta Dohaintzen gaineko Zergaren Legeko 26. artikuluan ezarritako zerga-irizpidea ere lagungarri izan daiteke.

Edozein kasutan ere, testamenturik gabeko oinordetzetan hainbat tramite egin behar da aurrez:

• Notarioaren aurrean oinordekoen deklarazioa, Azken Borondateen Erregistroko egiaztagiria aurkeztuta, ezkontidea testamenturik egin gabe hil zela frogatzen duena. Estankoetan saltzen den inprimakiaren bidez eska daiteke, postaz.
• Notarioaren aurrean banaketa akordio bat idatzi, ondasunen inbentarioa egin, horiek baloratu eta adjudikazioak eginez. Lortutako akordioa jasota utzi ahal izango dute koadernoan.
• Oinordetza zerga aurkeztu eta, hala badagokio, ordaindu, eta jabetza berria Jabetza Erregistroan erregistratu.

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du