Nabigatze-menua pasa eta edukietara joan

  • Bienvenido (ES) | Ongi etorri (euskarazko bertsioa) | Benvingut (versió en català) | Benvido (versión en galego)
  • Bienvenido (ES)
  • Buletinak
    •  | Utzi  | Aukerak |
  • Aurreko portadak

EROSKI CONSUMER, el diario del consumidor

Bilatzailea

logotipo de fundación

EROSKI CONSUMEReko kanalak


Kokapen honetan zaude: Hasiera > Paperezko bertsioa > Etxeko ekonomia

Λ

Eguberrietan bidaia egitea: Gabonetako erritmo biziegiaren aurkako alternatiba tentagarria

  Bidai bat Gabonetan, edo Urte Berritan? Zergatik ez? Jaiegun horiek familiarteko topaketak egite hutsera mugatu ordez, Eguberrietako erritmo azkarregitik deskonektatu eta toki berriak ezagutzeko aukera aprobetxatzen duten pertsonak geroz eta ugariago dira. Horrelaxe frogatzen du joera berriak: udako oporraldiak laburtu eta, horren truk, Eguberrietan edo Aste Santuan egun batzuetan atseden hartzeko aukera baliatzea. Prezioak izugarri garestiagoak ez izateaz gainera, neguko oporralditxo hauen abantaila, aireportuek eta hotelek -egun seinalatuetan izan ezik- agertzen duten lasaitasuna da. Parke tematikoak, Karibe aldea, Kanariar Uharteak eta, nola ez, eski estazioak izaten dira orain helmuga nagusiak. Bezeroa, berriz, 40 urte inguruko bidaiari ezkongabe edo seme-alabarik gabea da, lau eguneko egonaldiagatik 100.000 pezeta (601 euros) inguru gastatuko duena.

Turismo sektoreko mugimenduaren %9, Eguberrietan

Espainiako Merkataritza eta Turismoko Estatu Idazkaritzako Turismo-Azterketen Institutuak emaniko datuen arabera, estatuan iaz eginiko 119 milioi bidaien %37 (hau da, 44 milioi tokialdaketa, hor nonbait) "bidaia turistikoak" (bigarren egoitzara egiten ez direnak edo hiru egunetik aurrera luzatzen direnak, alegia) izan ziren. Horietatik %8k (3,4 milioik) bakarrik gainditu zuen Estatuko mugarik. Azken hamar urteotan oporraldiak luzatu egin direlarik, uda partean hartzen dira batik bat: bi turistatik batek egun horiexek aukeratzen ditu bidaia egiteko. Uda ondotik Aste Santua dator, egun horietan tokialdaketen %12 gertatzen baita, eta lasterketa horretan Gabonak atzerago ikusten dira, etxean geratzeko ohitura oraindik urratu ez delako: oporretako bidaien %9 baizik ez da egiten orduan.

Eguzkia, hondartza

Kanariak eta Karibe aldea dira Eguberrietako turismoaren bi helmuga gutiziatsu. Uharteetako hotelek hartzen dituzten turista ugariak uhartediko eguraldiaren onuragarriaren bila joan diren arren, erakargarri indartsuak dira prezio ez garestiegiak -75.000 pezetatik aurrera (450 euros) astebetea eman dezakegu aparthotelean, hegazkineko bidaia barne- . Karibe itsasaldea indarrean dago beti: bertara joateko, batez beste 200.000 pezeta (1.201 euros) patrikatik aterata, hondar zuri eta itsas ur turkesaren gozotasunean sei gau emateko aukera dasta daitezke. Txoko zoragarri horri, ordea, ezin asezko lehiakidea sortu zaio: Afrikar Karibe bataiatu berri duten horixe, herrialde nagusiak Cabo Verde eta Senegal dituena. Tentazio handiak dira bertarako bidaia laburragoa eta sustapeneko prezio merkeagoak (100.000 pezeta (601 euros) inguru).

Eskiatzeko prezioetan, aldeak

Elur zaleek eski gainean egingo diote, urtero bezala Urte Zaharrari agur eta denboraldi berriari abegi. Estazioek duela hilabete zabaldu zituzten pistak eta dagoeneko adituek ba omen dakite aurtengoak zer ekarriko duen: negute benetan eskuzabala dator, inondik inora. Aukera honen prezioen desberdintasuna, bezeroak bilatzen duen estazio-motaren, bidaia egiteko eraren eta hautatu nahi duen ostatuaren arabera aldatuko da. Frantziako Alpeek, adibidez, oso moduko prezioez gainera, munduko estaziorik hoberenetako batzuk eskaintzen dituzte: bidaiaz kanpo, 60.000 pezetaren (360 euros) truk eta apartamentu batean lojamendua harturik, eskiaz sei egunetan gozatzeko parada eskaintzen zaio zaletuari. Andorrak ere baditu aukera politak: lau egunetarako, ostatua, igotzeko aparatuak eta gainontzekoak, 40.000 pezetatik hasita (240 euros). Aragoiko Pirinioetara Gabon Zaharrean jende asko doalarik, Urte Berriari Astún, Candanchú, Formigal, Panticosa edo Cerler-eko aldapetatik behera eski gainean amilduz eman ohi zaio hasiera. Bost estazio horietatik gertu dagoela, Jaka da gazte jendeak nahien duen eski-herria urtero duen gauezko giro paregabeari esker. Horietako edozeinetan, 50.000 pezetagatik (300 euros) lauzpabost egun eman dezake eski zaleak apartamentuetan, eskiatzeko aparatu zenbaiten gastuak barne. Baqueira edo Sierra Nevadan Urte Berriari luxurik gabe ongi etorria emateak diru gehixeago eskatzen du: astebeteko 140.000 pezetaraino (860 euros); dena den, beste astebete itxaroteko pazientzia izanik, tarifak ia erdiraino jaisten dira: 60.000 (360 euros) eta 100.000 pezeta (601 euros) bitartean.

Mendi errusiarrean ibiltzea

Aspaldi honetan parke tematikoak aukera erakargarri bilakatu dira egunerokotasun hitsarekin hautsiz jaiegunak aprobetxatu (eta, bide batez, seme-alabei zor zaizkien sariak eman) nahi dituzten familientzat, lilurazko egonaldi batez gozatzeko. Eurodisney-ra joateko txartel batetik bestera alde handia dago -hotelean bi gau eta parkean hiru egun, bikotea eta bi seme-alabentzat- : tarifa merkeena 104.000 pezeta (615 euros) delarik, luxuzkoenaren kostua 205.000 pezetaraino doa (1.232 euros). Port Aventura eta Terra Mítica zabalik egongo dira aurtengo Eguberrietan eta, bertako "herrialdeek", Gabon giroaz jantzirik, goi-denboraldian baino askozaz ere prezio egokiagoak dituzte.

Alternatiba orijinalak

Tradizio urriago baina erakargarritasun handi-handiko aukerak izango ditu aurrekontu potoloagoa eduki eta bestelako zerbaitez gozatzeko asmotan dabilenak: Urte Berriko eguna finlandiar Rovaniemi Laponiako hiriburuan ematea 180.000 pezeta (1.100 euros) kostatzen da; Mediterraneoan barrenako kruzeroa, 150.000 pezetatik gora (900 euros) laguneko. Alternatiba erromantikoa dugu, azkenean: Praga, Viena, Budapest, Paris edo Londreseko goiztiria ikustearren 50.000 pezeta (300 euros) ordaintzeko prest bagaude.

Eguberrietan bidaia egiteko aholkuak

  • Izan malgua bidaia egiteko data eta orduak aukeratzean; saiatu ez mugitzen ostiral, igande eta egun seinalatuetan (abenduaren 24 edo 30ean, adibidez).
  • Eskatu informazio orritxoak hainbat bidaia agentziatan eta aztertu arreta handiz. Prezioak ez ezik, eskaintzen diren zerbitzuak ere konparatu behar dira.
  • Erreserbaren baliogabetze edo tarifen aldaketarik gerta ez dakizun, hartu txartelak ahal bezain laster.
  • Egun horiek bereziak direnez, kontuan hartu toki batzuetan ohiz bestelako ordutegiak izango dituztela: museo, ostalaritzako establezimendu eta bestelakoetan, adibidez. Oso litekeena da toki turistikorik itxita egotea ere.
  • Irakurri arreta handiz kontratua, argitu agentzian bertan zure zalantzak: iraupena, txangoak, klausulak, ardurak, baliogabetzeak, komisioak, etab. Era horretan asko ikasiko duzu eta geroago sor litezkeen arazoei saihets egingo diezu.
  • Eraman aldean beti kontratuaren fotokopia, agentziako telefono zenbakia eta harremanetan jartzeko izen bat bertan direla.

Familiartekoak ikusteko bidaiak

Turistiko hutsak diren bidaiez kanpo, trenez edo autobusez doazenek kontuan hartu beharko dute RENFE eta beste konpainia zenbait ere Gabonak aldean itxi egiten direla. Abenduaren 24 eta 31ko ilunabarrean, errepideak hutsik egoteaz gainera, aurreko egunetan jasan duen trafiko handiaren atsedena hartzen du trenbideak ere. Gabon Gauean eta Gabon Zaharrean, Paris aldera doazen Madril eta Bartzelonako trenak eta Paris Lisboa ibilbidea egiten duen Intercity izenekoa bakarrik dabiltza. Bezperetan bizi izaniko trafiko ikaragarri horrekin zerikusirik ez, beraz. Abenduaren 22tik urtarrilaren 2ra bitartean Estatu espainiarrean lau milioi lagunek erosten dute txartela: hori ere aurreikusirik edukitzea komeni izaten da, enpresak zerbitzua indartzeko urterik urte trenari bagoi gehiago eransten dizkion arren, teknologia berriei esker, txartelak geroz eta lehenago erosten dira. Beste horrenbeste jazotzen da autobusei dagokienez: bidaia egiteko denek egun bera hautatu dutenez, ibilgailuen kopurua biderkatu egiten den arren, toki-kopurua mugatua izaten da beti.

Eguberrietan krisialdiak areagotu egiten direnez, estresaren kontrako terapia egokia da bidaiatzea

Beste munduko asmorik izan gabe, atseden hartze hutsa ere estres iturri izan daitekeenez, eskuarki ezinezkoak izaten diren gauzak egiteko aukera oraintxe dugula ulertu behar da. Horrexegatik esaten dute psikologoek, denboraldi txiki horretaz gozatuko badugu, jarduerak antolatu egin behar izaten direla. Nahiz eta bidaia egiteko sasoi tradizionala uda partea izan, Eguberrietan krisialdiak (bikotearenak, bereziki) ugaldu egiten direnez, agian merezi du helmuga bitxiren batera iristeko aukera planteatzea.

Zeure ibilgailuan joatekoa baldin bazara...

  • Egokitu abiadura zeure ikusmenaren arabera. Lainoa edo euri-jasak direnean, piztu argia.
  • Gorde segurtasuneko tartea; edo, hori baino hobe: handitu tarte hori.
  • Elurra denean, gelditu automobila toki seguruan, ipini kateak dagozkien gurpiletan eta ibili mantso, astiro. Eragin poliki-poliki bolante, azeleragailu eta balaztei.
  • Hartu arreta-neurri guztiak, mantsotu abiadura toki laiotzean eta iparraldera begirako tokietan.
  • Ibilgailuan, segurantziaren funtsezko elementuak gurpilen pneumatikoak dira. Gainbegiratu horien presioa, marrak eta egoera orokorra.
  • Errepidea bustirik baldin badago, zapaldu balazta-pedala maiz samar, ibilgailua mantsotu gabe, pastillak lehortzeko. Beharrezkoa denean erantzun hobea emango dute horrela, bustita baino.
  • Ez ahaztu ordezkatzeko lanparak, kateak, izoztearen kontrako likidoa, arropa goxoa, bateriarako pintzak, linterna, triangeluak, alkohola (haizetakoko izotza kentzeko) eta eguzkitarako betaurrekoak, elurraren gehiegizko argitasunetik babesteko.


Ekintza honek Bizkaiko Foru Aldundiaren Kultura Sailaren laguntza jaso du

Beste zerbitzu batzuk


Bilatu

Copyright-i buruzko informazioa eta lege-oharra

Visita nuestro canal Eroski Consumer TV

 EROSKI CONSUMERen oso serio hartzen dugu zure datuen pribatutasuna, lege oharra. © EROSKI Fundazioa

EROSKI Fundazioa

Validaciones de esta página

  • : Conformidad con el Nivel Triple-A, de las Directrices de Accesibilidad para el Contenido Web 1.0 del W3C-WAI
  • XHTML: Validación del W3C indicando que este documento es XHTML 1.1 correcto
  • CSS: Validación del W3C indicando que este documento usa CSS de forma correcta
  • RSS: Validación de feedvalidator.org indicando que nuestros titulares RSS tienen un formato correcto