Irabazpidezko sozietatea kitatu egin daiteke dibortzio epaiaren ondoren

Nire emaztea eta biok bizi garen etxeak hipoteka dauka. Etxebizitza eta hipoteka emaztearen eta bere senar ohiaren izenean daude oraindik. Egoera horren aurrean legez zer egin daitekeen jakin nahi nuke.

  Dibortzio epai irmoaren efektuetako bat, ezkontzako lotura desegiteaz gain, irabazpidezko sozietatea desegitea da, horrelakorik balego. Hala ere, sarritan gertatzen da dibortzio prozedurak ezkontza-lotura haustera bakarrik bideratzen direla eta seme-alabei eta pentsioei buruzko neurriak hartzera, baina senar-emazteek ez dute eskatzen irabazpidezko sozietatea desegiterik. Kasu honetan, dibortzio-epaiak bertan behera uzten du irabazpidezko sozietatea, baina ez da kitatzen eta, beraz, ezkontide ohien artean egin beharko da ondasunen inbentario, ebaluazio eta banaketa.

Azken tramite hori konpontzeko gai horiek jasoko dituen idatzizko akordioa egin behar da. Hau da, irabazpidezko ondasunak bi multzotan inbentariatu, baloratu eta bereiztu behar dira eta "multzo" bakoitzaren titularitatea bikoteko kide bati izendatu.

Inbentarioko ondasunen artean etxebizitza hipotekatu bat baldin badago eta horren erabilera alde bietako bati izendatu bazaio, akordio bat proposatu ahal izango luke pertsona horrek, etxebizitzaren jabetza osoa eta karga bereganatzeko (hau da hipoteka eta hori ordaintzeko ardura osoa).

Ondasunen banaketa egiterakoan banaketan alde bien egoera berdintzera jotzeko ahalegina egin beharko da eta, horrela, ezkontide ohietako bati ondasun gehiago egokitzen bazaio, nolabaiteko ordaina eman beharko dio besteari, adibidez dirutan. Adostasunik lortzen ez bada, bide judizial zibilera jo beharko da irabazpidezko sozietatea kitatzeko, eta ezkontza-ondarea banatzeko prozedura judizialera jo.

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du