Zarata gogaikarriak aire egokitua eta ke-erauzgailua hondaturik dituen kafetegi batean

Lehen solairu batean bizi naiz eta gure etxe azpiko kafetegian hondarturik ditu aire girotua eta sukaldeko ke-erauzgailua. Zarata hirugarren solairuraino iristen da, baina hala ere, bizilagunen elkarteak ez du ezer egin nahi. Nire bizilagunak beharturik daude zaraten arazo hau konpontzen laguntzera ala neuk bakarrik konpontzen saiatu behar dut? Kasu horretan, zer egin behar dut?

  Lehenik eta behin, presidenteari eta administratzaileari planteatu behar diezu arazoa eta kafetegiaren jabeari ke-erauzgailua eta aire girotua konpontzea eska diezaioten eskatu. Jabetza Horizontaleko Legearen 7. artikuluaren arabera, jabe batek ez ditu beste jabekideen eskubideak kaltetu behar eta, beraz, debekatuta dago jarduera gogaikarri, osasungaitz, kaltegarri eta arriskutsuak egitea. Artikulu horretako aginduen arabera, komunitateko presidenteak, bere kabuz edo edozein jaberen eskariz, jarduera mota hori berehala bertan behera utz dezan eskatu behar dio horretan diharduenari eta bestela dagozkion ekintza judizialak abiaraziko direla ohartarazi.

Baina administratzaileak eta presidenteak ¿bereziki azken horrek¿ kafetegiko nagusiari arazoa konpontzea eskatzen ez badio, bizilagun elkarteko presidenteari gutun bat idaztea komeni da eta ezohiko batzar baterako deia egin dezala eskatu, gai zerrendan arazoa sartuta. Kafetegiaren jabeari, gainerako bizilagunekin batera, bilerara dei egingo zaio. Bileran bozkatu egingo da lokalaren jabeari ke-erauzgailua eta aire girotua konpontzea eskatzea.

Erabakia ezezkoa baldin bada, edozein bizilagunek du eskubidea Udaleko Erregistro Orokorrean salaketa aurkezteko, kafetegiaren eta bertako instalazioen ikuskapena egitea eskatuz, indarrean den araudia betetzen duen ala ez erabakitzeko. Orduan udalak eskatuko dio kafetegiaren jabeari behar diren konponketak egitea, ikuskapena negatiboa baldin bada.

Udal ordenantzek onarturikoa baino zarata maila handiagoak eragina du etxebizitzen bizigarritasunean eta kalte-ordainak ematera zigortzen dituzte epaileek horrelako arazoak sortzen dituztenak. Bestalde, kasu honetan, sukaldeko erauzgailuaren eta aire girotuaren egoera txarrak eragiten du arazoa eta, beraz, gogaikarria ez ezik, segurtasun gutxikoa ere izan daiteke kafetegiarentzat, bertako bezeroentzat eta eraikin osoarentzat.

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du