Etxebizitza alokatu bateko kalteak alokairu-kontratuko fidantzatik deskonta daitezke

Etxebizitza bat dut alokaturik eta kontratua amaitu aurretik uztera doaz maizterrak; nik ez diet inolako kopururik eskatu, baina eurek fidantza osorik itzultzea eskatzen didate. Etxebizitza oso zikin utzi dute eta horma batzuetan haurren pintadak eta urradurak daude. Fidantza berreskuratzeko eskubiderik badute ala margotzearen eta garbitasun enpresaren fakturak aurkeztu eta kopuru hori deskonta dezaket? Zer egin behar dut?

Kontratuaren amaieran fidantza itzultzea derrigorrezkoa da eta maizterrak giltzak eman eta hilabeteko epean egin behar da, errenta guztiak ordaindu eta kalterik ez dagoela egiaztatu ondoren.

Etxebizitzak kalterik balu, nagusiak deskontatu egin ahal izango luke kalteak konpontzeari dagokion kopurua. Horretarako, etxebizitza zegoen bezala uzteko beharrezko diren gastuen aurrekontua aurkeztu behar du etxearen jabeak eta maizterrekin kendu beharreko kopuruari buruz maizterrekin ados jartzen ahalegindu eta gainerakoa itzuli, alde biek idatziz jasota utzi eta sinatuta.

Maizterrak fidantza osorik itzultzea eskatzen badu, nagusiak idatziz jakinarazi behar dio (jaso izanaren egiaztapena duen gutun bidez edo hobe telegrama bidez) bere esku duela fidantza, kalteak konpontzeak eragindako gastua kenduta.

Bestalde legeak dio maizterrari itzuli beharreko fidantzak interes legalak sortuko dituela giltzak eman eta hilabeteko epean ordaindu ez baldin bada. Baina kuota ordaingabeak edo etxean egindako kalteengatik dagokion dirua deskontatu ondoren geratzen den kopuruaren interesak izango dira. Horregatik, itzuli beharreko fidantzatik kopururen bat kendu beharra badago, behin betiko saldoa jakiten den egunetik aurrera hasiko lirateke interesak kontatzen, hau da, bueltatu beharreko kopuruaren kitapen egunetik aurrera.

Bestalde, 1994ko legearen menpe dagoen alokairu-kontratu bat bertan behera uzteko, hilabete lehenago modu frogagarrian jakinarazi behar dute maizterrek kontratua luzatzeko asmorik ez dutela. Baldintza hori ez betetzeak kontratua automatikoki luzatzea dakar. Maizterrak legeak ezarritako epeen barruan jakinarazi gabe etxebizitza uztea erabakiko balu, kalte-ordaina eskatu ahal izango dio etxearen jabeak; kalte-ordaina hamabi hilabeteko errentaren parekoa izan daiteke eta horrek ondorioak izango lituzke fidantza itzultzeko edo ez itzultzeko obligazioaren aurrean.

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du