Salmenta-hitzarmenak beste inmobiliaria batzuekiko bakarrik lotzen du etxebizitzaren jabea

Duela hilabete batzuk gure etxea saltzeko enkargua eman genion inmobiliaria bati. Etxea ikustera etorri ziren eta salmenta-enkargua sinatu genuen eta ordainsari gisa salmenta-prezioaren portzentaje bat ezarri zen. Azkenik, lagun batzuen bitartez etxebizitza erosteko interesa zuen bikote bat aurkitu genuen eta zuzenean saldu genien. Inmobiliariara deitu dugu etxea salduta dagoela esateko eta komisioa eskatzen digute, salmenta-enkargua esklusiboa zela esanez.

Etxebizitza baten salmentarako hitzarmen esklusiboa beste inmobiliaria batzuekiko da jabearentzat loteslea, baina jabeak eutsi egiten dio etxea bere kontura saltzeko eskubideari, Salamancako Lurralde Entzutegiaren 1998ko irailaren 29ko epaiaren arabera. Inmobiliariaren erreklamazioak aurrera egin ahal izango luke jabeak etxebizitza berak pertsonalki baina aurrez inmobiliariak egindako gestioez baliatuz, saldu balu. Hala ere, hau ez da kasua, salmenta adiskideen bitartez egin baita.

Kasu honetan, etxebizitzaren jabeek argi esan behar diote inmobiliariari hitzarmena ez dela urratu salmenta zuzenean egin arren, ez baitzioten uko egin salerosketa eurek zuzenean egiteko eskubideari. Auziak aurrera egingo balu, abokatu bat kontratatzea komeniko litzateke. Ez da ahaztu behar higiezinen jabetzako agente baten eta etxebizitzaren jabearen artean egindako kontratu edo hitzarmena bitartekaritzakoa besterik ez dela: agenteak komisio bat kobratzen du, saltzailea eta etxea erosteko interesa duen pertsona harremanetan jartzeagatik, alde biek elkarrekin kontratua egin dezaten; eta komisioa kobratzeko eskubidea kontratua gauzatzearen menpe izango da.

Jabetza inmobiliarioko agenteen zerbitzuak ordaindu egin behar dira salerosketa bere partehartzearekin edo hori gabe egin arren, baina beti ere zuzeneko salerosketa egiteko inmobiliariak aurrez egindako gestioez baliatu baldin bada, Alacanteko Lurralde Entzutegiaren 1999ko maiatzaren 10eko epaian jasotzen denez.

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du