Basektomiaren emaitzari buruz ez da derrigorrez idatzizko informaziorik eman behar

Gizonezko bati basektomia egin zioten, baina bi urte geroago emaztea haurdun geratu eta mutikoa izan zuten. Gizonezkoak medikuaren eta aseguru etxearen aurkako demanda jarri zuen kalte material eta moralengatik, medikuak informazio osoa, ahozkoa zein idatzizkoa, emateari uko egin ziolako, adieraziz erreklamazioaren oinarrian ez zuela jartzen ebakuntza berez zuzena edo okerra izan zen.

Hala ere, Epaitegi Gorenak 2000ko azaroaren 2ko epaian dio egiaztaturik zegoela pazienteari behar adina informazio eman zitzaiola ebakuntzaren ondorengo konplikazio posibleen inguruan, idatziz ez izan arren. Horregatik, Epaitegiak uste du medikuak bete duela gaixoari informazioa emateko obligazioa eta gizonezkoaren erreklamazioak ezin duela aurrera egin eta, horrenbestez, ezetsi egin du errekurtsoa.

Epaitegi Gorenak epai honetan gogorarazten du 1994an eta antzeko auzo batean medikua kalte-ordaina ematera zigortu bazuen ere, pazienteari behar zen informaziorik eman ez ziola frogatu zelako izan zela. Epaitegiaren aburuz basektomiako ebakuntza batek ez du beti emaitza segururik izaten eta medikuak eman egin behar diola pazienteari ebakuntza, emaitza eta ondorioei buruzko informazioa, baina ez ezinbestez idatziz.

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du