Kalte-ordaina diagnostiko okerragatik

Emakume bat otorrinoarengana joan zen belarriko gaitz batengatik. Medikuak hainbat tratamendu jarri zizkion baina emaitza positiborik gabe, erdiko otitis kroniko aldebikoa diagnostikatu ondoren. Gero, lau ebakuntza egin zizkioten baina egoerak okerrera egin zuen eta aurpegiko paralisia izan zuen. Egoera horren aurrean, belarriko tuberkulosiaren proba egin zion medikuak, baina emaitza negatiboa izan zen.

Emakumea beste espezialista batengana joan zen eta hainbat proba egin ondoren, erdiko otitis tuberkulosoa diagnostikatu zioten eta beste tratamendu batekin, hobera egin zuen. Epaitegi Gorenak 2000ko azaroaren 3ko epaian dio egiaztaturik geratu zela lehen otorrinoak gaixoa tratatu zuen artean ez zuela sendatzen jakin, mediku espezialista izan arren. Zientziak eskaintzen zizkion bitartekoak ez zituen egoki erabili eta zuhurgabe jokatu zuen, tuberkulosi otikoaren proba berandu egin baitzuen eta emaitza negatiboari eutsi zion, analisiaren zuzentasuna egiaztatzeko beste analisi bat egin gabe. Horrela, arriskuan jarri zuen emakumearen osasuna. Medikuaren betebeharra bitarteko egokiak erabiltzeari buruzkoa den arren eta ez emaitzei buruzkoa, medikuaren arduragabekeria frogaturik geratu zen kasu honetan eta emakumeari hamabost milioiko kalte-ordaina ematera zigortu zuten medikua.

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du