Igogailuaren motorra aldatu beharra dago, ordezko piezarik egiten ez delako

Duela sei urte egindako etxebizitza batean bizi naiz. Igogailuaren motorra aldatu beharra daukagu, behin baino gehiagotan jo behar izan baitugu mantentze-lanez arduratzen den enpresara matxurak direla eta, eta egin beharreko konponketak egiteko ordezko piezarik ez dutela esaten digute. Nola liteke? Azken ekipoa saltzen denetik urte kopuru jakin batean ordezko piezak salgai izatera ez al ditu legeak behartzen?

 Halaxe da, bai. Salmenta osteko zerbitzu egokia eskaintzeko ordezko piezak edukitzeko obligazioa dago legez, Kontsumitzaileen Defentsarako Lege Orokorreko 11.5 artikuluak dioen bezala. Gainera, Txikizkako Merkataritzaren Ordenaziorako Legeak bost urteko gutxieneko epea ezartzen du, produktua fabrikatzeari utzi zitzaion egunetik aurrera.

Printzipioz behintzat, kontuan izan behar da igogailua ondasun higiezin bateko elementu komuna izanik, eta motorraren akatsa jatorrikoa izango dela pentsaturik, Kode Zibileko akats ezkutuengatiko saneamendua ezarri ahal izango litzatekeela. Horrela, jabeen komunitateak saltzaile-sustatzailearen aurkako demanda jarri ahal izango luke sei hilabeteko epean. Eta aukera hori dagoeneko iraungi den arren, zuzenbide zibileko obligazio eta kontratuen arauen arabera, bizilagunen elkarteak oraindik aukera izango luke erantzukizunak eskatzeko, saltzaile-sustatzaileari eta baita eraikuntza lanetan parte hartu zuten gainerakoei ere, subsidiario gisa.

Beste aukera bat igogailuaren mantentze-lanez arduratzen den enpresari erantzukizuna eskatzea litzateke, bi arrazoigatik: lehenik, ez litzateke ausartegia izango igogailuak akatsa jatorriz zuela esatea, eta bizilagunen elkarteari jakinarazi egin behar ziola; bigarrenik, akatsa jatorrizkoa izan edo ez, behin eta berriz aritu dira akats berbera konpontzen inolako emaitzarik lortu gabe eta, beraz, mantentze-lanetarako kontratuaren baldintzak ez dituzte bete. Gainera, denbora tarte luzea utzi dute pasatzen (sei urte), eta azkenean ordezko piezarik ez dagoelako matxura konponezina dela eta motorra aldatu beharra dagoela esan dute.

Abokatu batengana jotzea gomendatzen dizuegu eta eraman saltzaileak eraikinari buruz emandako dokumentazio guztia, salerosketa kontratuak eta jakina, igogailuaren mantentze-lanetarako kontratua. Horrekin batera, produktua fabrikatzeari utzi ondoren ezartzen den bost urteko epeari helduta, salaketa jar daiteke Autonomia Erkidegoko Kontsumo Zerbitzuetan, zigor ekonomikoa merezi duen akats administratiborik izan bada ere.

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du