Ordaindu gabeko kuotak ezkontide ohiari ere badagozkio

Banketxearen demanda iritsi zait, nire senar ohiak duela bost urte baino gehiago auto bat erosteko eskatu zuen mailegu baten kuotak ordaindu gabe dituelako, mailegua bion artean sinatu baikenuen. Gaur egun senarra eta biok bananduta gaude epai bidez, ez dugu ondasunik elkarrekin eta autoa berak duenez, gure arteko hitzarmen arautzailearen arabera senarra da mailegua ordaintzearen arduradun. Hala ere, bioi bidali digute demanda, bakoitzari bere etxera. Zerbait egin behar al dut?

  Prozedura judizialean aurkezteko abokatu batekin hitzordua jartzea gomendatzen dizugu. Seguruenik epaiketa exekutiboa izango da eta, jaramonik egingo ez bazenu, berehala banketxeko kontuak, nomina edo zure jabetzako beste ondasunen bat bahiturik izango zenuke. Baliteke epaiketa exekutiboa ez izatea, deklaratiboa baizik. Kasu horretan, demandari erantzun egin ahal izango zenioke, horretarako zeure defentsarako dituzun argudio guztiak alegatuz. Edozein modutan ere, epaiketan aurkeztea da garrantzitsua. Bestela auziak jarraitu egingo luke eta ordaintzeko kondena jaso ahal izango zenuke.

Hitzarmen arautzailean senar ohiak mailegua ordaintzeko konpromisoa hartu izanak ez du esan nahi gure irakurleak finantza entitatearen aurrean zorrik ez duenik. Edozein kasutan ere, etorkizunean epai batek bankuari kopuru hori ordaintzera behartuko balu, senarraren aurkako demanda jarri ahal izango luke banaketa sententzia irmo bidez erabakitakoa bete ez duelako, bankuari ordaindu behar izan diozun kopurua itzul diezazun. Auzia ebitatzeko, senar ohiarekin eta finantza entitatearekin ados jartzen saiatzeko aukera ere badago. Hori ezinezko balitz, behar dena baino kopuru handiagoa eskatzen dizutela alegatu ahal izango zenuke. Kasua hala balitz, iraungipena, zor den kopuruaren jakinerazpenik ez zaizula egin eta abar ere erreklama zenezake.

Kasuko gorabehera konkretuen arabera izango da hori eta zure abokatuak aztertu beharko du. Gogora dezagun epai bidez erabakitako hitzarmen arautzaile bidez senar ohiak maileguaren kuotak ordaintzeko konpromisoa hartu izanak ez duela irakurlea erantzukizunik gabe uzten banketxearen aurrean, hitzarmenak sinatzaile biak - emakumea eta senar ohia- baino ez baititu lotzen. Emakumearen diru sarrerak lanbide arteko gutxieneko soldataren bikoitza baino txikiagoak badira, ofizioko abokatua eta prokuradorea eskatu ahal izango ditu eta prozedimendu judiziala gelditu horiek izendatu artean.

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du