Elikagaien etiketak: nola irakurri?: Informazio oso erabilgarria

Nutrizioari buruzko etiketa

Produktu batek zenbat eta nolako nutrikariak dituen zehazki ezagutzeko unean, biziki baliagarria da. Estatu espainolean nutrizioari buruzko etiketa xedatzen duen arautegia -ur mineralei eta osagarri dietetikoei aplikatzen ez zaiena- arautua duenez, etiketa hori agertzea ez da nahitaezkoa, agerpenean nutrizio-alorreko ezaugarriak -hala nola "kaltzio ugarirekin aberastua", "kolesterol gutxi dauka" edo "A eta E bitaminez osatua"- aipatzen dituzten produktuetan izan ezik. Nutrizio-alorreko etiketaren formatoak bi dira une hauetan: eskematikoenak, ordenu honetantxe, balio energetikoa, proteina, karbohidrato eta gantzen kopurua besterik ez du adierazten. Besteak, zabalagoa izaki, azukreez, gantz-azido saturatuez, zuntzaz eta sodioaz ematen dio informazioa kontsumitzaileari. Halaz ere, bi etiketetako edozeinek eman dezake bestelako osagaien (kolesterol, bitamina, mineral-gatz, almidoi eta abarrez) gaineko informaziorik. Era berean, elikabide osasungarri eta orekatua segitzeari dagokionez, nutrikari jakin bat egunean hartzea komeni den guztirako kopuruaren portzentajeetan adierazita, bitamina eta mineral-gatz zehatzen kopuruak ere ager daitezke.

Ontziratu gabeko elikagaiak

Bai establezimendu komertzialetan ontziratu gabe dauden produktuek, bai kontsumitzaileak hala eskatuta ontziratzen direnek ere, etiketan edo saltokian ezarritako letreroan, nahitaez agertu beharreko datuek erakutsi behar dituzte:

• Produktuaren izena, nozitu duen tratamendu edo egoera fisikoa, kategoria, kalitatea, barietatea eta jatorria.
• Haragiari dagokionez, klasea edo kanala (Nafarroako txekorra, adibidez) eta pieza horren izen komertziala (txankarra, azpizuna, etab). Arrainetan, aurkezpen komertziala egiten den era aipatu behar da. Establezimendu komertzialak ontziratzen dituen produktuetan, berriz, hurrengo datuak agertuko dira:
• Izena, egoera fisikoa, kalitatearen kategoria, barietatea eta jatorria.
• Osagaien zerrenda, bidezkoa balitz.
• Kopuru garbia.
• Iraungitze-data edo gehieneko iraupena.
• Enpresaren izen-helbideak.
• Kontserbatzeko baldintza bereziak, bidezkoa balitz.

Etiketak agertu behar ez duena

Elikagaiak halako edo bestelako gaitzak prebenitzeko edo sendatzeko propietateak dituela adieraztea debekatuta dago eta gainera arautegia urratzea da. Ez dugu sinetsi behar, hortaz, "hezurrak indartzeko" edo "kolesterola erregulatzeko lagungarri" bezalako molderik, esne edo antzeko produktuez ari direla. Onartezinekoa da, era berean, elikagai batek ezaugarri bereziak dituela azaltzea, horrelako produktu guztiek ezaugarri horiexek dituztenean. Horrela bada, legez koloratzaile zein kontserbatzailerik ezin balia ditzakeen elikagaiaren etiketak horrelakoak ez dauzkala adieraztea arauaz kontrakoa da.

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du