Insalud, gaixo baten suizidioaren erantzule

Epaitegi Gorenak, 1999ko urriaren 4ko epai bidez, Santanderko Ospitalean bere buruaz beste egin zuen gazte baten amari 14 milioiko kalte-ordaina ematera zigortu zuen Insalud. Gaztea, anaia lagun zuela, Kantabriako ospitale horretara joan zen kontsulta eta ospitaleratzeko parte batekin; parte horretan hainbat ohar jasotzen zen gaixoaren egoeraz, suizidio arriskua, lorik egin ezina eta negarrerako joera besteak beste. Larrialdi zerbitzuan ordu erdiz azterketa egin zioten eta azterketa eten egin zen anaiak abisu bat jaso zuelako (autoa gaizki aparkaturik utzi zuen); anaiak alde egin zuen bost minutuz. Itzuli zenean, anaia gaixoa ez zegoela konturatu zen. Segurtasun zerbitzuari berri eman eta handik bost ordura gaztearen gorpua aurkitu zuten. Gorenaren ustez Administrazioak ez zuen behar adinako arduraz jokatu: bere buruaz beste egitea ekidin egin ahal izango zen, joera hori zuen gaixo bat desagertu zela berehala jakinarazi izan balitz (etengabeko zainketa hurbila eta eraginkorra ezartzea esan nahi du horrek). Gainera, Gorenaren aburuz, ulertezina da gaixoa aurkitzeko bost ordu behar izatea, tarte horretan bere buruaz beste egiteko aukera izan baitzuen hark.

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du