Ezinbesteko kausagatik bidaia bertan behera uztea

Lagun talde batek Kanariar irletarako astebeteko bidaia kontratatu genuen agentzia batean. Irteera baino egun bat lehenago gure aitaren gaixotasuna larriagotu egin zen eta eritetxera eraman behar izan genuen. Emazteak eta biok bidaia bertan behera uztea erabaki genuen eta lagunetako batek agentziari horren berri eman zion. Ahal genuenetan bulegora joateko esan zioten. Irteera baino egun pare bat geroago bidaia agentziara joan ginen, dirua edo gutxienez diruaren zati bat itzul ziezaguten. Baina irteerara agertu ez ginenez eskubide guztiak galdu genituela esan ziguten. Egia da, ala badu erreklamatzea?

Kasu hau araututa dago Bidaia Konbinatuen Legean. Lege horren arabera, erabiltzaileak edozein unetan egin dezake atzera eta agentziari gestio eta anulazio gastuak ordaindu egin beharko dizkio, halako gasturik bada, eta baita bidaiaren prezio osoaren portzentaia bat ere. Portzentaia hori aldatu egiten da, ezeztapena zenbat egun lehenago egiten den kontuan izanda. Egia da Bidaia Konbinatuen Legearen arabera kasu honetan bezala bidaiaria irteeran aurkezten ez bada, ordaindutako kopurua berreskuratzeko eskubidea galdu egiten duela. Baina arau orokor honek badu salbuespena: ezinbesteko arrazoia.

Kontsumitzaileak ezinbesteko arrazoiren batengatik atzera egiten badu, ordaindutakoa osorik berreskuratzeko eskubidea izango luke. Aita eritetxean izatea ezinbesteko arrazoi kontsideratzen dugu eta egoera horrek konponbidea izan behar luke epai bidera jo gabe. Hitz egin ezazu agentziako zuzendariarekin eta egiaztatu agiri bidez aitaren gaisotasuna eta eritetxeratzea eta alegatu ezinbesteko arrazoia Bidaia Konbinatuen Legeko 9.4 artikuluaren arabera. Hala ere ordaindutako kopurua berreskuratzerik lortzen ez baduzue, eska ezazu Erreklamazio Orria edo jo ezazue zuzenean udalerriko Kontsumitzailearen Informaziorako Udal Bulegora edo kontsumitzaileen elkarteren batera, dagokion erreklamazioa egiteko. Tramite horiek egin ondoren ere agentziak bereari eusten badio, joan abokatu batengana agentziaren kontrako demanda jartzera.

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du