Nabigatze-menua pasa eta edukietara joan

EROSKI CONSUMER, el diario del consumidor

Bilatzailea

logotipo de fundación

EROSKI CONSUMEReko kanalak


Kokapen honetan zaude: Hasiera > Paperezko bertsioa > Gaurkotasuna eta aisia > Azaleko gaia

^

Informazio honetan agertzen diren datuak, informazioak, interpretazioak eta kalifikazioak burutu ziren momentuari soilik dagozkio eta, beraz, iraupen mugatua dute.

Santiago Bideko 98 aterpetxetara bisitan: Ia denek dute oinarri-oinarrizkoa; hoberenak, Errioxa eta Galizian

Hurrengo hilabeteotan 99 Urte Xacobeo hori sekulako fenomeno turistiko bilakatuko da: aurreko "urte santuan" (1993) pelegrinen kopurua erdira ere iritsi ez zelarik, aurten Santiago Bidea milioi laurden bat erromesek egingo dutela espero da.

Erromesak: hiru lagunetik bakar bat doa behar bezala trebaturik

Pozaldi eta atsekabe uneak, atseden eta nekealdiak, zauri eta sendaketak, urduritasun eta lasaitasuna... Bidaztiak eguneroko esfortzua gainditzeko eztenkari suertatuz, edo geroz eta barnerago sartzen den labana gisa, azkenean erromesari amets eta itxaropenak bide-ertzean uztarazten diotelarik, Santiago Bidea hamaika zailtasun, eragozpen eta trabak josita dago hasiera-hasieratik. Bidezkoa da, horrenbestez, ehundaka kilometroko erromesaldi neketsua osatu ostean Santiago bisitatzeko helburua bete dutenen aholkua entzutea. Horregatik aditu nahi izan du CONSUMER-ek eginkizun horretan trebatuta zeuden 204 erromesen iritzia.

Lehen-lehenik, hiru bidegiletatik bat bakarrik entrenatua zegoela jakinarazi zitzaigun: bidera irten aurretik, 44 egun iraun zuten probek, batenaz beste. Erromesaren ingerada taxutzeko saiakeran, erantzunek egiaztatzen dute bidaztia Santiago Compostelakora, Leon, Nafarroa eta Lugotik batik bat abiatzen dela, Bidea arrazoi kulturalengatik (erromesen %23), erlijiosoengatik (%20) eta erronka pertsonal gisa (%18) egiten duela, taldean ibiltzea nahiago duela (hamarretik bederatzik), hamar bat egunetan batez beste 232 kilometro egiten dituela eta ibilbide osoan 36.600 pezeta gastatzen dituela. Beste aldetik, motxilan toaila eta inpermeablea (erromesen %99), lozakua (%95), txanoa (%85), kantinplora eta komuneko papera (%79) eta botikina (%72) zeukatela esan ziguten. Bidegileen erdiak ia, ekipajean gida idatziren bat ere bazeraman. Hamarretik bederatziren ustez, lurraldean lurraldeko erakunde eskumendunek Bidearen hainbat alderdi hobetu beharko lituzkete, hala nola, aterpetxeen kalitate eta kopurua, seinaleztapena, osasun-asistentzia eta ibilbideko segurtasuna. Hamarretik bederatzirentzat mendi- eta errepide-tarte batzuk arriskutsu gertatzen dira, A Coruña, Lugo eta Leonen, bereziki. Azkenik, bizialdi hau egina pozik sentitzen zirela adierazi bazuten ere, erromesen %15ek ez dakite oraindik berriro ere saiatuko den Bidea egiten eta %3ak seguru diosku berriz ez duela egingo horrelakorik.

Zer da Compostelana?

Erlijiozko motiboengatik bidea egiten duenari, gutxienez ehun kilometro oinez edo zaldiz edo berehun kilometro bizikleta gainean egin dituela frogatzen duenari, Erromesaren Nortasun karta aurkezten badu, Santiago Compostelako Katedralak ematen dion ziurtagiri ofiziala da Compostelana izeneko hori, Bideak zeharkatzen dituen herrietako parrokiek, aterpetxeek edo pertsona ordezkariek sinaturiko txartela, alegia. Ziurtagiri horren jatorria XIV. mendekoa da eta txartela bera Erromesaren Bulegoan bertan jaso daiteke (Rúa do Vilar, 1, Katedralaren ondoan).

Monte Do Gozo-ko aterpetxea, ezin alderatuzkoa

Santiago Compostelakoaren atetan dagoen Monte do Gozo-ko aterpetxea bisitatu ez ezik balioetsi ere egin zuen CONSUMER-ek. Ezin konpara daiteke zentro hau beste ezeinekin, berebiziko edukiera duelako (800 plaza) eta, noski, gazteentzako aterpetxe, hotel-plaza eta kanpinak osaturiko egoitzategi zoragarri batean dagoelako kokaturik. Erromesaren atsedena bermatzeko behar den guzti-guztiaz dago honitua Monte do Gozo-ko hau. Horregatik, zerbitzuen zabalagatik, erosotasunen anitzagatik, txostenetik kanpo aztertzea nahiago izan dugu, besteekiko aldea izugarria baita alderdi denetan: Bide Frantsesean zehar aztertu ditugun gainontzeko 98 aterpetxeekin batera, "zaku berean" sartzeak balioespena desitxuratu egingo luke.

Gure aholkuak

  • Animo handia, karga txikia. Ez zamatu motxila (ez hamar bat kilo baino gehiago ipini) alferrikakoak diren edo Bidean zehar eros daitezkeen gauzekin; uhalen igurtziak ekidingo ditugu horrela.
  • Prestakuntza fisikoa egin behar du, abiatu aurretik, bai oinez doanak, bai bizikletaz edo zaldi gainean ibiliko den erromesak. Ibilbide labur baino menditsuetan egindako prestakuntza dugu biziki ariketa gomendagarria.
  • Oinetako aproposak. Oinari zeharo egokituak eta orkatilari ongi eusten dioten bota erosoak, zola labaingaitza dutenak, ezinbestekoak dira. Galtzerdiak kotoizkoak, garbiak, lehorrak eta ongi sartuak beti, igurtzirik egin ez dezaten. Lauan egin beharreko ibilaldi, atsedenaldi edota paseoan erabiltzeko, hobe kalitate oneko zapatila arinak ere eramaten badira gainean.
  • Hobe Bidea udaberri edo udazken-hasieran egitea. Aurtengo udaran aterpetxeetan lo egitea ez da erdiespen makala izango, lepo beterik egongo direlako, seguruenik. Tarte batzuetan beroa itogarria izan ohi da eta negu gorrian, berriz, mendialdeko ibilbideak hotz-hotzak.
  • Jazkera, eguraldiaren araberakoa. Udan, kotoizko arropa arina; neguan, mendiko anorak, eskularruak eta artilezko arropa. Negu gorrian, buruan txapela edo txanoa, hotzaren kontra, eguzkiaren babes, udaroan. Eguzkitako betaurrekoak ez ahantzi etxean.
  • Lozakua arras baliagarria gertatzen da, aterpetxeetako plaza asko eta asko lurrekoak baitira. Lozakurik ez badaramazu, sartu motxilan burko-zorroa: aterpetxe askotan higienea oso kontzeptu primitiboa da eta.
  • Kaxuela eta paderak motxilan zamatzea akats larria da. Aterpetxe batzuetan janariak zerbitzatzen dira eta prezio merkeko jatetxeak ere ugari topatzen dira Bidean. Sukaldean aritzea baimentzen duten babeslekuek badute horretarako tresneria aproposa. Sardeska, koilara eta labana eramanik, aski duzu.
  • Ahuleziak jo edo makalaldian ikus dezakezu zeure burua: eduki eskura gozokiren bat eta fruitu lehorrak, animoak suspertzeko. Ez ahantzi kantinplora bete ur, ez makila, makulu edo bastoia ere, bidezidor zailetan eroso eta seguruago ibiltzeko.
  • Komuneko papera, toaila eta azkazalak mozteko tresna dira motxilan nahitaez sartu beharreko gauzak. Kateorratzen bidez arropa zabalduko dugu, motxilatik zintzilik, lehor dadin.
  • Botikina: babak lehertzeko orratza eta haria, desinfektatzailea, guraizeak, esparadrapoa, kotoizko bendak, alkohola, krema antinflamatorioa eta aspirina edo parazetamola. Eguzki-erredurarik gerta ez dakigun ere, berariazko krema.
  • Errepidean, joan beti ezkerretatik. Bidea taldean egiten ari bazara, ez bildu tropelka errepidean. Gurutze Gorriak berebiziko lan ona egiten du Bidean. Premia izatekotan, eskatu hari laguntza.
  • Ez da komeni gauez ibiltzea baina, halaz ere, ilunpetan bidean aurrera egin behar izanez gero, erabili erreflektatzaileak ibilgailuetakoek ikus zaitzaten.
  • Beroa dela medio, makalaldia nozitzekotan, bilatu toki freskoa atseden hartu, likidoa edan eta galdutako mineralak ostera eskuratzeko (litro bat uretan, koilaretxokada bat gatz eta koilaretxokada erdi bikarbonato). Karranpak latzak badira, ipini gatz gehiago uretan.
  • Dokumentazioa (Gizarte Segurantzako txartela, eta NAN), ezinbestekoa. Garrantzi handikoa, ordea, Donejakue Bideari buruzko gidaliburua, arrunt baliagarria delako. "Compostelana" izenekoa nahi badugu, eskuratu erromesaren nortasun-karta den zigilu-liburuarekin, Bidea hasten duzun unean bertan.
  • Hobe gainean kreditu-txartelak eramatea eskudirua baino, seguruagoak direlako.
  • Belarrietako tapoiek, gelako lagunen zurrungarik ez aditzeko balio dute.

Orrialde-zenbaketa



Ekintza honek Bizkaiko Foru Aldundiaren Kultura Sailaren laguntza jaso du

Beste zerbitzu batzuk


Bilatu

Copyright-i buruzko informazioa eta lege-oharra

Visita nuestro canal Eroski Consumer TV

 EROSKI CONSUMERen oso serio hartzen dugu zure datuen pribatutasuna, lege oharra. © EROSKI Fundazioa

EROSKI Fundazioa

Validaciones de esta página

  • : Conformidad con el Nivel Triple-A, de las Directrices de Accesibilidad para el Contenido Web 1.0 del W3C-WAI
  • XHTML: Validación del W3C indicando que este documento es XHTML 1.1 correcto
  • CSS: Validación del W3C indicando que este documento usa CSS de forma correcta
  • RSS: Validación de feedvalidator.org indicando que nuestros titulares RSS tienen un formato correcto