Medikua ez zen azaldu amona gaixotzean

  Pertsona batek mediku bat eta Nafarroako Gobernua auzitara eraman zituen bere amona larrialdi zerbitzuen bitartez behar bezala ez atenditzeagatik. Medikuaren laguntza eskatu zuen telefonoz eta medikuak botika bat gomendatu besterik ez zion egin, gaixoa ikustera joan gabe. Gaixoa larriago jartzean, bilobak SOS telefonora dei egin zuen berriro eta zerbitzu hori medikuaren bilagailura mezua pasatzen saiatu zen, baina ez zuen erantzunik jaso. Azkenean gaixoaren etxera joan zen medikua, injekzio bat jarri zion eta berehala, hil egin zen andrea.

Nafarroako Justizia Epaitegi Nagusiak, 1998ko urriaren 20 epaian, egintza horiek utzikeria adierazten dutela uste du. Epaitegiaren iritziz medikuak lehen deia jasotzean joan behar zuen gaixoaren etxera, eta ondorioz, bere jokaera ez da mediku-praktika zuzenari dagokiona. Kasu honetan, adituen txosten bidez medikuaren utzikeriaren eta gaixoaren heriotzaren artean zergati-eragin harreman zuzena dagoenik esan ezin den arren, (medikua berehala joan izan balitz ere seguruenik hil egingo baitzen) Epaitegiak hildakoaren bilobari kalte moralagatiko ordaina ematera zigortu zituen sendagilea eta Nafarroako Gobernua. Izan ere, behin eta berriz laguntzarik gabe utzi izanaren eta kalte moralaren artean harremana baitago, eta beraz, familiakoen artean betirako geratu baita gaixoak behar zuen arreta jaso izan balu bizirik aterako ote zen zalantza.

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du