Kirurgia estetikoko ebakuntza baten ondorengo akatsak

Duela hiru urte kirurgia estetikoko ebakuntza egin zidaten, goiko eta beheko betazaletako poltsak kentzeko. Ebakuntzaren ondoren zenbait arazo izan nuen, baina zirujauak krema hidratatzaile bat eta bostekoa eman zizkidan eta amaitutzat eman zuen kontua. Gaur egun "akatsak" ditut eskuineko begiko goiko betazalean eta ezkerreko behekoan. Beste zirujau batengana joatea erabaki dut kaltea konpontzen saiatzeko, baina aurrez erantzukizunak eskatzeko abokatu batengana joatea gomendatzen didate, ebakuntza garestia baita. Zalantzan nago: ez dut egindako ebakuntzaren fakturarik; bai ordea eritetxekoa, ebakuntzaren aurretik ateratako argazkiak eta zirujauak ebakuntzaren ondoren egindako errezetak. Ez dakit hainbeste denbora pasa eta gero ezer erreklamatzerik izango dudan.

  Printzipioz, beste zirujau baten kontsultan abokatua hartzea gomendatu badizute, gure ustez, baliteke betazaletako "akatsak" deitzen dituzunak lehen zirujauaren okerreko lan baten ondorio izatea eta zirujau hark lanbideko pauten arabera ez jokatu izana. Hala bada, eska ezazu medikuaren txostena. Bestalde, fakturarik ez izan arren, badituzu lehen zirujauarekin izandako harremana frogatzeko beste bide batzuk. Eritetxeko faktura eta errezetak adibidez, agiri dokumentalak baitira. Gainera, epaiketan beste froga batzuk ere erabil daitezke, hala nola zirujauaren beraren aitorpena, lekukoena, eta eritetxean egin zizuten ebakuntzaz jasota egon daitezkeen agiriena. Pasatako denborari dagokionez, kontratuko erantzukizuna planteatzea komeni da, hamabost urtera iraungitzen baita. Zirujau estetikoak emaitza batzuk lortzeko betebeharra duela ezartzen duen jurisprudentzia duzu zure alde eta horrek, bilatzen den hobetze estetikoa lortzeko garantia handiagoa eskatu ahal izatea dakar.

Zirujauak ebakuntza egin aurretik eman zizun informazioak ere garrantzi handia izango du; informazio osoa, egiazkoa e.a. eman ote zizun jakiteak, alegia. Baliteke abokatua hartzea komeni izatea, frogak, txostenak eta pleituan dituzun aukerak baloratu ahal izateko, besterik ez bada ere.

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du