Igogailuak eta komunitateko kuotak

Nire gurasoek 25 metro karratuko ganbara bat dute. Bizilagun guztiek berdin ordaintzen dute komunitateko kuota, 4.000 pezetakoa. Batzuek igogailua jarri nahi dute, baina beste batzuk ezetzean daude. Igogailua jarriko balitz, laugarren pisurainokoa izango litzateke, eta beraz, bosgarreneko bi ganbarak igogailu gabe geratuko lirateke. Hona nire galderak: Nire gurasoek instalazioa ordaindu beharra izango al lukete, legez?; hala balitz, zein proportziotan?; zenbat bizilagunen baietza behar da igogailua jarri ahal izateko?; gutxieneko bat al dago?; nire gurasoek ordaindu egin behar al dute komunitateko kuota (4.000 pezeta), gurea gainerako etxebizitzen erdia baino txikiagoa izanik?; fatxadako konponketa bat egin edo igogailua jartzen denean, lokal komertzialek ere ordaindu behar al dute eta zein proportziotan?; gainera, ganbara ohiko etxebizitza ez dugunez, ez dugu bizilagunen bileren funtzionamenduaz berri askorik izaten.

  Komunitateko gaiez egunean egoteko, ganbararen jabearen ohiko bizilekua izendatu behar litzateke jakinarazpen eta komukazio mota guztietarako helbide gisa. Bileretara joatea ezinezko bada, beste norbaiti idatziz eman dakioke ordezkotza. Igogailua jartzeari dagokionez, Jabetza Horizontalaren Legeak Juntaren aho bateko erabakia eskatzen du arau edo printzipio orokor gisa, tartean bizilagun elbarriren bat denean izan ezik. Kasu horretan, nahikoa litzateke bizilagunen hiru bostenak osatutako gehiengoaren erabakia.

Hala balitz, gure ustez ez zaudete ordaintzera behartuta. Gastu orokorretako partehartzeaz, berriz, Jabetza Horizontalaren Legeak ezartzen du partaidetza-kuotaren araberakoa izango dela (metro karratu kopuruaren arabera, batez ere, baina baita altuera, etxebizitza kanpokoa edo barrukoa den e.a. ere kontuan izanda) edo adostutakoaren araberakoa bestela. Komunitatean hileroko kuota denek berdin ordaintzea hitzartu bazen, baliozkoa da hitzarmen hori. Irizpidea aldatzeko, komunitatearen aho bateko erabakia behar da berriro ere. Hau da, oraingoz, ordaindu egin beharko dituzue hileroko 4.000 pezetok. Merkataritzako lokalen partehartzeari dagokionez, parte hartzera behartuta daude eta partaidetza-kuotaren edo adostutakoaren arabera parte hartu behar dute, elementu komunen mantenimenduan eta zainketan, (fatxadarenean esaterako), non eta Tituluan edo komunitatearen estatutuetan -halakorik balego- salbuetsita ez dauden. Igogailua jartzerakoan ordainketarik egin behar duten? Igogailua jartzeko erabakia hartuko balitz, gastu horretatik salbu uztea izango litzateke normalena.

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du